அன்பு + அறிவு + திறமை +பாசம் = எங்கள் R.S சார்

நான் மேலையூரில் உள்ள சீனிவாசா மேல்நிலை பள்ளியில்   + 2 படிக்கும் போது எனக்கு கணக்கு பதிவியல் மற்றும் வணிகவியல் பாடம் எடுத்தவர் எனது அன்பு ஆசிரியர் R.சுப்பிரமணியன் அவர்கள். இன்று நான் ஒரு ஆசிரியராக பல மாணவர்களுக்கு பிடித்த ஆசிரியராக இருக்க இவர்தான் காரணம்.

இரண்டு வருடத்தில் இவர் மாணவர்களை அடித்தது இரண்டு அல்லது முன்று முறை மட்டுமே. அதுவும் லேசாகதான். அன்பால் திருத்துவதில் வல்லவர். மாணவர்கள் வெறும் புத்தகபுழுவாக மட்டும் இருக்ககூடாது என நினைப்பவர். நான் படிக்கும் போது ஆனந்தவிகடனில் வைரமுத்துவின் “தண்ணீர் தேசம்” கவிதை நாவல் தொடராக வந்தது. அதை எனக்கு அறிமுகம் செய்து வாரம் வாரம் விகடன் வாங்கிவந்து படிக்க சொல்வார்.

விகடனில் வந்த 3D படங்களை வெறும் கண்ணால் எப்படி பார்ப்பது என கற்றுத்தந்தார். புத்தகத்தில் உள்ளதை அப்படியே வாசிக்கும் சிலருக்கு மத்தியில் முதலில் பாட சம்பந்தபட்ட ஆனால் அன்றாட வாழ்வில் நடக்கும் சில விஷங்களை நகைசுவையாக விலக்கிவிட்டு பின்பு பாடத்திற்குள் செல்வார். இதனால் பாடத்தில் கவனம் அதிகமாகும். இப்போது நானும் இந்த விதத்தில் தான் நடத்துகின்றேன். இவர் தந்த ஆர்வத்தினால் தான் பள்ளி முதல் கல்லுரி வரை கணக்குபதிவியலில் முதல் மதிப்பெண் எடுக்க முடிந்தது. இன்றும் நான் புதிதாக வகுப்பு எடுக்க ஆரம்பித்தால் இவரை பற்றி சொல்லிவிட்டுதான் துவங்குவேன்.

NSS ல நான் இல்லை என்றாலும் நான் அசைப்பட்டதிர்க்காக NSS  முகாமில் கலந்துகொள்ள அனுமதித்தார். இப்போது மிகவும் பிரபலமாக உள்ள நாகநாதன் கோவில் (கேது ஸ்தலம்) அப்போது பாழடைந்து கிடந்தது , அவர் தலைமையில் சென்ற நாங்கள் அதை சுத்தம் செய்தோம்.

பல வருடங்களுக்கு முன்பு படித்த எங்களை கூட என்னும் பெயர் சொல்லி அழைக்கும் அளவுக்கு நாபக சக்தி உள்ளவர். 

நாளை அவர் ஒய்வு பெரும் தினம். இவரது ஒய்வு அந்த பள்ளிக்கு கண்டிப்பாக இழப்புதான். இனி வரும் வருடங்கள் இவருக்கு இன்பமாகவும் , நல்ல உடல் நிலையுடனும் பல்லாண்டு வாழ வாழ்த்துவோம் வாருங்கள்.

Tweet