மைக்ரோசொப்ட்டின் புதிய சமூக இணைய வலையமைப்பு விரைவில்

உலகின் முதனிலை மென்பொருள் நிறுவனங்களில் ஒன்றாகக் கருதப்படும் மைக்ரோசொப்ட் நிறுவனம் புதிய சமூக இணைய வலையமைப்பு ஒன்றை அறிமுகம் செய்யும் முனைப்புக்களில் ஈடுபட்டுள்ளதாகத் தெரிவிக்கப்படுகிறது.

அண்மையில் மைக்ரோசொப்ட் இணையதளத்திலிருந்து கசிந்த தகவல்கள் இதனை பறைசாற்றும் வகையில் அமைந்துள்ளது.

டுலாலிப் (Tulalip) என்னும் சமூக இணைய வலையமைப்பை மைக்ரோசொப்ட் உருவாக்கி வருவதாகக் குறிப்பிடப்படுகிறது.

டுலாலிப் என்னும் இந்த சமூக இணைய மற்றும் தேடுதளம் பற்றிய தகவல்கள் தவறுதலாக இணையத்தில் பிரசுரமாகியிருந்தது.

“Socl.com”  என்னும் இணைய தளத்தில் இந்த தகவல்கள் வெளியிடப்பட்டிருந்தன.

மைக்ரோசொப்ட் ஆய்வு குழுவினரால் தயாரிக்கப்பட்ட புதிய திட்டம் தொடர்பான உத்தேச ஆவணமொன்றே இவ்வாறு பிரசுரிக்கப்பட்டிருந்தது.

தகவல்களை பரிமாறிக் கொள்வதற்கும் தகவல்களை தேடுவதற்கும் மிகவும் காத்திரமான இணையமாக இந்த புதிய சமூக இணைய வலையமைப்பு அமையும் என வெளியிடப்பட்டிருந்த தரவுகளைக் கொண்டு அணுமானிக்க முடிந்ததாக ஆய்வாளர்கள் சுட்டிக்காட்டியுள்ளனர்.

‘உங்களுக்கு எது தேவையோ அதனை தேடுவதற்கும், எதனை பகிர வேண்டுமே அதனை மிகவும் இலகுவாக பகிர்ந்து கொள்ள முடியும்’ என்ற இந்த புதிய இணையத்தின் அறிமுக வாசகத்தில் குறிப்பிடப்பட்டிருந்தது.

துரதிஸ்டவசமாக இணையத்தில் கசிந்த தகவல்களில் உத்தேச இணையத்தின் செயன்முறை தொழிற்பாடுகள் குறித்த தகவல்கள் உள்ளடக்கப்படவில்லை.

கடந்த 12ம் திகதி Socl.com என்னும் இணையத்தை மைக்ரோசொப்ட் நிறுவனம் கொள்வனவு செய்திருந்தது.

மைக்ரோசொப்ட் நிறுவனத்தின் தலைமைக் காரியாலயம் அமைந்துள்ள மேற்கு வொஷிங்டன் பிரதேசத்தைச் சேர்ந்த அமெரிக்க மக்களை குறிக்கும் சொல்லே டுலாலிப் ( Tulalip ) என்பது குறிப்பிடத்தக்கது.

சமூக இணைய வலையமைப்பு ஒன்றை உருவாக்குவதில் மைக்ரோசொப்ட் ஆர்வம் காட்டுகின்றதா என்பது இன்னமும் உத்தியோகபூர்வமாக உறுதிப்படுத்தப்படவில்லை.

எனினும், கூகிள் பிளஸ் சமூக இணைய வலையமைப்பு பிரபல்யம் அடைந்து வருகின்ற நிலையில், மைக்ரோசொப்ட் நிறுவனம் மற்றுமொரு சமூக வலையமைப்பை உருவாக்க முயற்சி செய்தால் அது சவால் மிக்கதாகவே கருதப்பட வேண்டுமென சுட்டிக்காட்டப்பட்டுள்ளது.

Thanks: vanakamnet.com

Tweet