கலைஞரிடமிருந்து ‘அந்த’ வார்த்தையா? எல்லாம் ரொம்ப ஓவருங்க!

 தமிழக எதிர்க்கட்சித் தலைவர் விஜயகாந்த், தனக்கு எதிராக கேவலமான முறையில் கூறப்பட்ட குற்றச்சாட்டுக்கு கண்ணியமான முறையில் பதில் கொடுத்து, தமிழக அரசியலில் ஒரு புதிய பாதையைக் காட்டியிருக்கிறார். அவர்மீது கேவலமான முறையில் குற்றச்சாட்டைச் சுமத்தியவர், முன்னாள் முதல்வர் கலைஞர் கருணாநிதி.

இதற்கு சிறியதாக ஒரு பிளாஷ்பேக் உண்டு.

“போலீஸ் அதிகாரி ஜாபர் சேட் இஸ்லாமியர் என்பதால்தான், அவர்மீது அ.தி.மு.க., அரசு நடவடிக்கை எடுக்கின்றது” என்று ஒரு அறிக்கை விட்டிருந்தார் முன்னாள் முதல்வர் கருணாநிதி. (அறிக்கைதான் விடமுடியும். பின்னே, அவரால் சட்டசபையில் எழுந்து பேசத்தான் முடியுமா?) இதற்கு சட்டசபையில் பதில் கொடுத்த விஜயகாந்த், “அப்துல் கலாமை இரண்டாவது முறை ஜனாதிபதியாக வரவிடாமல் தடுத்துப் பழி வாங்கியவர் கருணாநிதி. அப்போது இஸ்லாமியர் என்று பார்க்கவில்லையே” என்றார்.

விஜயகாந்தின் கூற்றுக்கு பதிலடியாக அடுத்த அறிக்கை விட்டார் கருணாநிதி. “பைத்தியக்காரர்களுக்கு எல்லாம் நான் பதில் சொல்வதில்லை” என்றது, பழுத்த அரசியல்வாதி என்று அழைக்கப்படும், அவரது அறிக்கை.

இந்த அறிக்கைக்கு பதில் தெரிவித்துள்ள தே.மு.தி.க., தலைவர் விஜயகாந்த், “முன்னாள் பிரதமர் ராஜிவ் கொலை வழக்குக் குற்றவாளிகள் முருகன், பேரறிவாளன் மற்றும் சாந்தன் ஆகியோரின் கருணை மனுக்கள் நிராகரிக்கப்பட்டுள்ளன. அதை மறு பரிசீலனை செய்து, தூக்கிலிருந்து காப்பாற்ற வேண்டும். தி.மு.க. அதைச் செய்யாது. ஆனால், ஆளுங்கட்சியினர் சர்வாதிகாரமாக நடப்பதாக, தி.மு.க. தலைவர் கருணாநிதி கூறியுள்ளார். எனது பேச்சுக்கு, “பைத்தியக்காரர்களுக்கு எல்லாம் நான் பதில் சொல்வதில்லை” என்று கூறுகிறார்.

அவரை “கலைஞர்’ என்றுதான், இன்றுவரை கண்ணியத்துடன் நான் பேசுகிறேன். அவர், எந்தக் காலத்தில் கண்ணியத்துடன் பேசினார்?” என்று கூறியுள்ளார்.கண்ணியமாகப் பேசுவதா? திராவிட பாரம்பரியம் என்று சொல்லிக்கொள்ளும் ஆட்களுக்கு அதிலெல்லாம் அவ்வளவாகப் பழக்கமில்லையே!

நன்றி : விறுவிறுப்பு . காம்

Tweet